瓊瑤開拍的劇集《天上人間——還珠格格3》，昨日正式在北京開鏡，但《天》劇角色已人面全非，代替蘇有朋剃頭飾「五阿哥」的古巨基，更要奉命增肥五磅來配襯新「小燕子」黃奕和新「紫薇」馬伊莉。
瓊瑤開拍的電視劇《天上人間——還珠格格3》，昨日在北京一間片廠內舉行拜神開鏡儀式，吸引大批內地傳媒偷雞採訪，而幾位主要演員更一律以清裝造型初次現身。
今次《天》劇卡士大換血，除周杰演回福爾康之外，古巨基（基仔）取替蘇有朋，剃頭扮演「五阿哥」，「小燕子」就由趙薇換上黃奕，「紫薇」則由林心如變成馬伊莉，就連張鐵林的「皇阿瑪」也由狄龍頂上。
不過不少內地傳媒都稱讚基仔的造型有貴氣，而瓊瑤更下令目前體重一百三十磅的基仔增肥五磅，務求令他的皇帝相更福氣。
基仔昨日透過長途電話說：「我聽到啲人話我有貴氣都好意外，之前我幾驚㗎，我自細就叫大頭仔，驚清裝造型唔好睇，但出嚟嘅效果又幾滿意，瓊瑤阿姨就話我好瘦，叫我食肥啲，增肥多五磅就啱啦。」
基仔對於新版「小燕子」黃奕讚不絕口，他說：「我同佢都幾有默契，今次我哋做兩公婆，我對佢嘅感覺幾好，大家都夾到。」
基仔表示，今次他已預了五個月時間拍《天》劇，問到瓊瑤有否要求他在拍劇期間不可接其他工作，基仔說：「除非係之前講定間中有嘢做至度期，我都想專心做好一件事嘅。」
採訪：朱芷瑩