港股噚日持續牛皮，全日跌2點，收報10831，成交僅55.95億元，而新一批盈富基金第二日只賣出500萬個單位。
鈞濠（115）下午大幅急升43.3％，升至0.172元收市，成交都不俗，有成3473萬元，有消息話幕後人士已經班到水，將孖展倉轉去第二間行，唔使憂再俾斬倉。
此股曾經由0.68元急瀉至0.159元，其後最低跌至0.115元，雖則噚日大幅反彈，但與斬倉前水平相比仍有一大段距離。若果幕後人士要將股價造上斬倉前水平，此股將有超逾兩倍升幅，但係，又談何容易呢？
市場傳出QDII將於7月份落實，但規模只得30億美元，比市場預期的100億美元為少。不過，兩隻中資證券經紀股仍然蠢蠢欲動，好似有料到咁款，申銀萬國（218）升12.5％，而第一上海（227）則升11％。
雖則話QDII只會以閉端基金形式進行，而呢類基金都未必會流入港股，呢兩隻經紀股未必直接受惠，不過據聞話國內散戶仍然會喺7至8月透過不同途徑流入炒港股，根本毋須透過甚麼QDII，Cookie話，只要國內散戶資金殺到，呢兩隻經紀股就必升無疑，紅籌國企股亦會上升。
繼自然美（157）後，同日掛牌嘅啟帆（646）經過一輪整固後噚日亦開始開車，反彈27.27％，收0.56元。重上招股價水平，成交4021萬元。黑客話，此股會繼續揚帆而去，應該暫時都未使驚沉船住。