恒指最低之時下挫85點，收市埋單只係微跌2點。隔晚美股再跌，影響輕微。杜指已連跌4日，唔見228點，有機會反彈。港股跌唔落，預咗美股回升。
分類指數中，最靚係地產指數，收13967，升147點，幅度係1.1%。4大地產股中，恒地（012）升1.9%，新世界（017）升1.6％，新地（016）升1.3%，長實（001）升1.1%。地產分類指數周二起跌破10日平均線，理論上唔係幾好，不過昨日高收，只相差0.3%，領導地產股只要升多1個半個價位，分類指數又可重越10日線，走勢轉佳，然後再上試50日線。50日線較現時水平，高出4%。
地產股昨日尾市明顯轉強，基金入市轉為積極。今個月15號政府本財政年度首次賣地，歌和老街與西九龍填海區地皮一併推出，兩幅地皮既然係地產商勾出，已有獲得政府同意底價，拍賣成績必然理想，至少屬於可接受。
𠵱家距離15號賣地，實際只有5個交易日，基金要買定地產股等賣地，開始偷步。
下星期，大藍籌中可以優先考慮地產股。賣地成績理想，直接最先受惠嘅係新地同恒地，兩公司業務比較單純，售樓盈利佔比例最大。
大股東持股紀錄顯示，郭氏家族透過滙豐信託基金，喺個幾星期前增持新地125萬股，當時市價大約58元，同𠵱家相若。不妨對郭氏家族的增股行動投下信心一票。
新地連續兩日低位56.75元，觸及上星期底部，止跌回升，短期內估計上試10日線（60元），然後再上試18日線（61元）。
新一批盈富基金（2800）昨日再售出500萬單位，較前日800萬單位少，估計下星期會有較佳成績，為假後大市上升帶來動力。