全新日產March於上月初推出以來，瞬即成為日本一眾年輕車迷嘅追捧對象，氣勢直迫人氣小車本田Jazz之餘，據聞本港代理亦有意將之引入；但最近某大水貨車行，就以迅雷不及掩耳嘅速度，引入新版March抵港。新車除造型設計予人耳目一新之感外，寬敞嘅車廂布局，以及一台動力充沛嘅1.2公升引擎，更係新車嘅賣點所在；若然你正常購入一部與別不同嘅小車作座駕的話，相信呢部新版March會係你嘅至佳選擇。
記者：黃凱穎
攝影：陳偉強
ImageGirl：Don
或者大家會覺得，呢部身形短小精悍嘅March，車廂空間會來得狹窄，但答案卻剛好相反；試車當日連筆者在內共載有三名乘客，而後排更放有攝影器材，聽落好似好迫咁，但實際上卻仍有充裕嘅車廂空間，絕無一分小車予人嘅擠迫感，加上承托力甚高嘅座椅，乘坐舒適感亦都唔差㗎。講回車廂布局方面，除座椅嘅用料手觸感不俗外，中控台布局又見吸引，而且更備有原廠音響及冷氣等設備，兼為觸手可及嘅設計㖭；車內亦設有不少雜物匣，以便擺放零碎雜物㗎。
試車當日，筆者駕駛住呢部賣相咁Cute嘅March，取道東區走廊及柴灣道前往石澳，沿途惹來不少豔羨目光之餘，就連坐在巴士上層嘅乘客亦探頭外望，並對車子評論一番，可想而知新車嘅吸引力係幾高呢。至於點解會咁？其實原因好簡單，皆因此車除被掃上鮮豔奪目嘅橙色外，圓渾兼極富前衞感嘅造型，亦係惹來不少途人對你（或者係你部March）行注目禮嘅原因。話說回頭，車子所有部分都來得圓渾，無論係頭燈抑或係尾燈組合，都係以圓形或橢圓形出現，從而與車子嘅線條互相呼應；而揭背式嘅尾門設計，亦可為你於提存尾廂行李時，增添不少方便。
雖然呢部用作測試嘅新版March，係以一台1.2公升直4DOHC引擎作為動力核心，馬力輸出只有90匹，相比起頂級1.4公升型號嘅98匹馬力爭些少，但表現亦見不俗，就算行走陡斜嘅柴灣道時，亦見有靈敏嘅起步及加速反應；加上引擎運轉寧靜及車廂嘅隔音功夫不俗，因而令行車時沒有太大嘅噪音傳入車廂。而闊大嘅車窗及門邊鏡，亦可給駕駛者及乘客有更佳嘅視野範圍，至於一套由前輪柱式獨立及後輪扭力連桿所組成嘅懸掛系統，配合剛勁有度嘅車架，實能令March可有不俗嘅路面循迹性；由前輪透氣碟及後輪鼓式所組成嘅制動系統，亦能令車子可有收放自如嘅效果呢。
優點
外形：圓渾吸引富前衞感，勢必惹來途人嘅豔羨目光。
車廂：空間寬敞富實用性外，座椅承托力亦見不俗。
設備：配搭齊全，使用方便。
操控：引擎輸出平均，運轉亦見寧靜。
缺點
1.外形過於前衞，或未能迎合部分用家口味。
2.軚盤稍輕，略嫌欠缺路面感。
引擎：1240cc直4DOHC
馬力：90ps/5600rpm
扭力：12.3kgm/4000rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：165/70R14
尺碼：3695×1660×1525mm
軸距：2430mm
車重：920kg
平均耗油：19.0km/L
新車售價：$113,000
車輛提供：富利堡汽車（28776700）