上深圳可以買「平價」Nike同LV，但其實各位亦可到華強北路各大售賣手電配件商場走一趟。原因一字咁淺，就是「平」到你唔信：香港賣幾十至百幾的手機電池呢度二十蚊有找，各款Handsfree最平十蚊樓下。其實本港先達場都有唔少手機舖嚟呢度拖貨返港售賣，所以話，既然嚟開深圳又點可以唔過嚟掃平貨呢？
記者：宋國榮攝影：林栢鈞、黃子偉
鳴謝：衛訊電訊、百利科技
售價最平
深圳最出名的手機配件集散地華強北路上有多間商場，小記格過價，以深圳通信市場內舖頭的零售價最平。例如Nokia8系電池，比起華強北路其他手機舖平幾十蚊。而且佢哋唔會獅子開大口只做批發，即使你入去只買一粒電池，佢哋開價都十分便宜，相反其他手電舖你唔買一百幾十粒都唔會平畀你。
記者測試
大家用手機電池無非想叉一次用足幾日，咁究竟原廠電和平價電哪一個較耐用？小記就做了一個簡單試驗，將SAMSUNGA408原廠電及平價電叉滿後先後放入同一部手機使用，並設定兩者的通話數量相若。結果發現平價電待機時間大約用到3日，質素唔算太差，但原廠電就比平價電用多約1日時間，所以話一分錢一分貨就係咁解。
全民熱選
深圳買配件雖則夠平，但用平貨會否影響手機性能？而且平價電耐唔耐用？呢啲疑慮通常會令用家卻步。咁究竟香港及時常北上的用家對於平價配件又會點睇？小記訪問過50位市民，原來大部分朋友都會因深圳所賣的配件較平而會購買，就算質素可能有所參差都冇問題。
街訪：會否購買深圳的平價電池？（被訪者50人）
民意：34人會買(佔68%)；16人唔會買(佔32%)
專家解畫
好多人都會懷疑深圳賣的平價電池會影響手機性能，小記為此登門造訪位於先達廣場的手機維修店百利科技，店主Ricky及Ken表示，根據佢哋多年的手機維修經驗所知，用平價配件整壞手機的情況並不常見。即使有，中招率都好低，大約是100部機中僅得2、3部出現此情況；反而用原廠配件但使用不當，一樣會對手機造成影響。
查詢：百利科技（27700083）