豐田Estima自推出以來，一直備受用家追捧；而本港某大水貨車行，最近更特別引入兩款配有不同包圍嘅特別版抵港，以吸引買家注意。兩者各自散發出唔同嘅韻味之餘，其中一款名為EstimaSDURider嘅特別版新車，無論賣相同設備配搭，都擁有頗高嘅吸引力；而另一款名為EstimaLeManEdition嘅特別版，亦予人有濃厚嘅跑味㖭。而喺嚟緊嘅周末，佢哋更會以優惠價（$359,000）發售；有興趣嘅朋友，不妨留意一下喇。
記者：鄭達基
攝影：陳偉林
雖然呢部EstimaSDURider嘅外形，大致上與原有嘅Estima相近，但當你細心留意下，就會發覺頭尾泵把皆裝有擾流器之餘，車身兩側更裝有裙腳、大口徑尾喉，以及四輪跑車合金軨配搭等等，望落更具瞄頭外，加上高置尾定翼，重予人帶有點跑味嘅感覺㖭。
而一台3.0公升V6引擎，就能夠為Estima提供高達220ps/5800rpm嘅馬力輸出，而扭力輸出數值亦達31.0kgm/4400rpm，加上一套4前速全自動波箱，從而令新車可有不俗嘅性能表現；而由前輪柱式獨立，及後輪扭力連桿所組成嘅懸掛系統，配合剛勁有度嘅車架，行車循迹性之高亦予人有莫大信心。
至於車廂方面，除布局仍以靈活多變為大前提外，車內座椅更改以手觸感更佳嘅雙色高級真皮座椅配襯，乘坐感較前貼服舒適得多；而當遇有需要時，更可將座椅覆摺放平，以增加尾廂嘅載物容量，又或者係形成敞大嘅卧鋪。與此同時，車內不少地方如冷氣送風口、中控台及四幅式軚環等等，皆裝有碳纖維裝飾，夠晒突出吸引外；當然唔少得重有雙天窗配搭，從而給乘客有更多親近大自然嘅機會啦。
同場加映
若然你覺得上面一部EstimaSDURider唔係太啱你口味，同時你又想將自己部Estima，改變成一副跑車模樣的話，就不妨考慮一下呢部EstimaLeManEdition喇；皆因此車除裝有全車碳纖維大包圍外，另外更裝有一套四輪闊大跑車合金胎軨，望落可謂跑意十足。加上車廂設備齊全，同埋以限量形式引入本港，相信定能惹來車迷嘅垂青㗎。
車輛提供：富利堡汽車（25737111）