小朋友大晒！因為今日係4月4日兒童節，小朋友除咗想爸爸、媽媽帶佢哋食大餐外，最想就係收到玩具做禮物。小朋友鍾意嘅玩具花款多籮籮，不論公仔、車仔、機械人全部都係佢哋嘅心頭愛，父母唔知買乜好？小記畀個貼士大家，有電視同廣告配合嘅玩具，小朋友多數鍾意，所以爆旋陀螺同麗佳都好多Fans支持。唔想買錯禮物，就要睇吓小朋友點揀禮物啦！
記者：張穎倫
攝影：林栢鈞、周旭文、陳盛臣
喺電視嘅影響力之下，麗佳嘅玩具絕對係細路女嘅恩物，8吋公仔更係已經搶晒Barbie同Jenny嘅風頭。𠵱家呢批4吋幼稚園生系列，更係小朋友新寵，事關佢哋除咗有幾十款Q版細公仔之外，更有埋學校、別墅等情景配搭，變化特多，可以同小朋友齊齊玩。
售價：
每隻$58.5（公仔）
$99（學校）（你想Teen地）
有陳慧琳呢位人氣偶像力撐，再加埋飛天小女警本身嘅可愛造型，花花、泡泡同毛毛三位小女警，莫講話女孩子，就算小男孩都未必可以抵擋得住。今次佢哋三個更換上紅色旗袍，多一點中國味又夠搶眼，每隻8吋高，而且又有埋膠吸盤畀你吸喺玻璃上，玩得又睇得。
售價：一套三隻$199（玩具反斗城）
只係播咗短短一個星期，𠵱家喺玩具店、便利店以至文具店，每逢放學時都會有一大班小朋友圍住玩陀螺，有人玩比賽有人玩改裝，有男有女。其中最多人捧場嘅除咗斷晒貨嘅「暴風戰龍」，就首推麥斯嘅「玄武聖獸」，若然送畀小朋友作為兒童節禮物，佢哋一定好開心！
售價：每隻$150（鴻興玩具）
以前啲搪膠公仔，郁吓要四、五百蚊一個，淨係大人同炒家先玩得起，失去咗玩具嘅真正意義。所以𠵱家市面上都多番啲平價搪膠公仔，百零蚊有一個，啱晒細路仔玩。好似呢款惡人同盟Max，有成6.5吋高，關節、配件夠晒多，面相做得樣衰夠抵死，更帶埋耳環，又有埋灰色同黑白囚犯Look做特別版，都算好玩。
售價：$69.9（連爆旋器）
（你想Teen地）
年紀小嘅男孩子，可能未開始識玩機械人，所以車仔就可能係佢哋嘅首選。橫掃成年人嘅Q版賽車，其實都有好多小朋友捧場，貪佢車仔細細夠得意，回力車自己又識行，對細路仔零舍吸引。好似今次新出嘅300ZX、藍鳥SSS、消防車、ImprezaWRX同富士360，都跟足真車神韻，消防車更係細路仔嘅搶手貨。
售價：每架$23.9（你想Teen地）
近排頭文字D街機大獲好評，再加上漫畫又就快去到文太同掃把佬登場呢個高潮，所以呢套Tomy車仔絕對出啱時侯。一套6架有齊AE86、FC、FD、R32、SILEIGHTY同AE85，最正係今次採用特別版製作，每架車嘅Detail位，好似牌子、車軚等都比一般Tomy車細緻，價錢又平，大人細路都啱玩。
售價：一套$129（鴻興）
如果小朋友怕學英語的話，呢本互動書仔就可以幫到佢。佢除咗有簡單嘅英語故事同可愛插圖外，更有一支魔法筆，只要將筆按在生字上，書仔便會讀出正確讀音同串出生字，而按在插圖時，亦會讀出圖中物件嘅英文發音，例如按在盒上就會讀出Box，按圖識字，大大增加小朋友學英語嘅興趣，適合四歲或以上的小朋友。
售價：$399.9（玩具反斗城）
售賣點
你想Teen地（26283343）
旺角新世紀廣場3層379B及C舖
鴻興玩具（28914739）
灣仔太源街19號C舖
玩具反斗城（27309462）
尖沙嘴海運大廈地庫032號舖
(C)HUDSONSOFT/TAKARA‧BEYBLADEPROJECT‧TVTOKYO
Licensedbyd-rightsInc.andMediaLinkAnimationInternationalLtd.