究竟「一國兩制」係乜東東？唔同嘅人可能有唔同嘅睇法。喺財爺阿松心目中，「一國兩制」原來係塊蛋糕，睇得又食得。
最近沐浴愛河分外風騷嘅阿松接受最新一期台灣《天下雜誌》訪問，向台灣人大力推銷香港「一國兩制」成功經驗。佢形容「一國兩制」對外國投資者來說，就好似個「蛋糕」(havethecakeandeatit)，「既可以看，又可以吃」，因為喺「一國兩制」護蔭下，香港可以繼續成為國際城市，既可以吸引內地企業嚟香港上市集資，又可以分享內地經濟發展成果，而呢件「蛋糕」，台灣同埋國內城市，包括上海都冇嘅。
阿松又形容「一國兩制」下，香港同大陸嘅邊界就好似Goretex做嘅衫一樣，「裏面的汗和熱氣可以透出來，但外面的水卻進不去」。而北京對香港政治上完全冇干預，啲京官重經常同佢講：「你哋自己搞定啦，唔好煩我！」
喺訪問中，阿松重不忘提起佢嘅女友霞妹，話曾經喺北京同霞妹去街市同消費場所，見到佢哋班中產階級嘅購買力「好厲害」，證明內地市場潛力極大。
八方一早聽聞證券界猛人王守業，四月會在日本東京娶新抱，聽講係因為見到最近飛哥、田少嫁女咁墟冚，唔想搶太多風頭，所以特登揀喺東京。不過八方聽聞會有個香港團過去捧場，飲今個星期日呢餐喜酒。呢個團認真唔嘢小，有政務司司長煲呔曾、九鐵主席田北辰同九鐵另一位行政總裁楊啟彥等。既然大家咁畀面，連煲呔都去，唔知出身銀行界嘅阿松會唔會一齊去飲，呢個都係觀摩嘅好機會。話晒一年內阿松都要做「老襯」，唔趁早安排得好好睇睇，霞女到時點肯嫁你？
不過知情人士就話呢餐酒未必有阿松份，事關佢最近好唔得閒，一到假期就玩失蹤，唔知同霞女去邊過二人世界，人哋都唔敢打擾熱戀中的阿松。加上香港嘅多程通行證霞女就話輕易到手啫，日本仔嘅簽證就麻煩得多，如果唔可以帶埋霞女一齊去，阿松咪要過一個寂寞嘅週末？
E-mail：