大市繼續牛皮偏軟，全日波幅僅得70點，成交唔夠51億，靜到得人驚。如果唔係國企股郁吓，隻佑威（627）又生性，趙飛雲肯定悶到變咗趙失魂。
佑威果然重遊歷史高位0.75元，趙飛雲噚日下晝喺呢個位排隊0.75元沽5萬股，俾人攞咗。尾市見掃0.76元，電腦判收0.75元，希望有機會低幾個位補番。
恒指昨收10833，跌44點。早段跌過落去10783，諗住跌多幾十點就落第1注，買和黃Call輪9110或恒指Call輪9045，點知個市又彈番上去，結果都係未郁手。不過唔緊要，今日係本周最後1個交易日，長周末假期在前，若然外圍冇大變，港股今日9成牛皮，大把時間畀你買貨。
藍籌牛皮，國企就有啲生氣。其中石化股走勢最悅目，據講係因為部分石化產品價格回升。上海石化（338）彈力最強，升逾8%，燕化（325）升7%，儀征（1033）落後些少，亦升5%。
世局紛亂，國企股暫成避風港，應該重有幾日炒吓，目標係相對落後嘅重慶鋼鐵（1053）。重鋼昨收1.12元，以大陽燭升破下降軌，技術走勢轉好，現價可買入，若升破1.18元阻力，可見1.25元。