講咗好耐嘅部長制方案就快出爐，除咗一眾有興趣做部長嘅人虎視眈眈外，因為部長制出現而可能飯碗不保嘅公務員，同樣好緊張，其中包括政府新聞處班高官。
一眾部長將會有權自己聘請新聞秘書，咁請邊個好呢？可以請番街外嘅自己友；又可以學阿松咁搵ＡＯ幫忙；再數落去，其實新聞處都有好多人跟開啲局長，對有關政策相當熟悉。
八方聽啲老友講，為免職位繼續向外流失，新聞處會力薦同事出任部長嘅新聞秘書，但先決條件係傾掂數，唔使脫離公務員隊伍。
講開新聞處，八方忍唔住又八多兩句，新任處長蔡瑩璧係ＡＯ出身，過往多次代表港府與海外貿易夥伴談判，作風一向硬朗，大家都希望佢可以幫新聞處「揮」多啲嘢。之但係實際情況係點呢？以前開完行政會議，特首辦嘅另一位ＡＯ公關大員林瑞麟，會上新聞處辦公室同班新聞官分析形勢。但蔡大姐上任後，新聞處十幾二十人每星期就要拉隊去特首辦，聽候林專員嘅講解。邊個係莊邊個做閒，都唔使八方多講喇啩！
E-mail：