長實（001）長沙灣泓景臺仍在促銷中，但隔籬昇悅居就已經準備登場，新地（016）同信德（242），今日會為樓盤設於旺角新世紀廣場嘅香薰園林示範單位，舉行剪綵開幕儀式。發展商話，個盤位於荔灣南岸，但點解會咁講，睇嚟今日要解吓畫至得。
地產代理為了要做成生意，有時要千里尋業主，中原地產青衣城分行經理麥成輝透露，盈翠半島12座Skyhouse單位，1352方呎，連892方呎天台。由於業主已移民，授權親人代為放售，而該親人在東莞設廠，代理經過多個小時長途電話議價後，重要深夜送票到東莞才能促成交易，單位最後以623.8萬元成交。
蘭西啱啱收到戴德梁行嘅一份大中華區物業報告，雖然主要係回顧舊年嘅市況，但裏面有啲資料幾有參考價值。原來北京寫字樓市道，都好似香港咁，受到美國911事件拖累，需求出現放緩。
跨國機構為了慳錢，將寫字樓由甲級商廈遷往非核心地段；相反內地機構就逆市擴充。但期內亦錄得全幢寫字樓租務成交，如銀河証券租用西城區國企大廈全幢，總樓面37.6萬方呎，另漢斯公司租用朝陽區現代盛世大廈，總樓面73.6萬方呎。
上海嘅寫字樓市道同北京相似，部分響上海設有辦事處嘅「財富五百」企業，都有縮減開支，暫緩搬遷同擴充計劃。
蘭西