MPF（強積金）去年投資回報差，引起不少人埋怨。不過退休金係長期投資，只要啲基金經理唔係太水皮，強積金始終係有回報嘅，我哋要放長眼睇二三十年至得，年輕打工仔尤其是係要有耐性。
好似電訊盈科咁，裁員八百八十五人，震撼立法會啲工會議員，不在話下，但因為有長期退休計劃，被裁啲員工比沙田禾輋嗰間拉閘執笠嘅酒樓嘅員工幸福得多（此乃相對性講法，唔好誤會，鬧左丁山冇良心）。
酒樓員工要向勞工處求助，追討欠薪、代通知金、強積金，結局多數就係問「破產保障基金」攞錢，就因為太多工人俾執笠僱主撻數，呢個保障基金自身難保，如果唔係可以打商業牌照登記費主意，自己都要破產。
電盈啲被裁員工就可以攞番一嚿，消息人士同左丁山講，被裁八八五人之中，四成三攞到最少三十八萬元，三成一最少攞六十八萬，一成六最少攞一百萬，最高有人攞六百五十萬，剩番嗰七巴仙，當然攞多過一百萬啦。呢啲錢包括所有按勞工法例賠償嘅金額，加上公積金，你話如果大公司冇公積金制度嘅話，啲工人點可以攞番一嚿錢吖。
左丁山之流就杰囉，打咗好多年工，除咗最初幾年之外，其餘嘅，冇一份工有公積金、退休金。捱來捱去得個桔，𠵱家仍然望天打卦，咪話唔驚。