我Apple姐一向身嬌肉貴，冇病冇痛都會定時定候去搵名醫check吓身體。 前日我去養和醫院驗眼，諗住幫襯眼科名醫張叔銘，我Apple姐都預咗睇症要排隊，點知等等吓忽然有個把聲嬌滴滴嘅女人向護士投訴，話等咗好耐都未輪到佢。 怨聲載道 講真，睇大醫生梗係要等啦，我Apple姐望真啲睇吓邊個咁巴閉，原來係潘廸生太太余桂珠。余桂珠重話：「我有朋友識得張醫生，所以我先嚟搵佢，我已經等咗半個鐘喇。你一早叫我除咗隱形眼鏡喺度等，等咗咁耐都未輪到我？我唔等得啦！」佢轉頭重話要走。