新張食店，如何打響頭炮，吸引頭一批擁躉呢？玩大平賣，平到連學生哥都食得起，實掂！首先推出$8.8晚餐優惠孖寶，人少揀一款，人多食兩款；然後再來幾十蚊任食火鍋包湯底配料酒水。哇，幾吸引，今晚就去挑戰自己的食量啦！
記者：楊一凡 攝影：伍慶泉
任食火鍋由晚上六點鐘開始，分段收費以入座時間計算：六時至八時半每位$58，八時半至九時半每位$48，九時半後每位$38；星期六日或公眾假期惠顧多加十蚊；小朋友減十蚊。火鍋送湯底，清湯、鴛鴦、皮蛋芫荽任揀。配料近百種，肥牛、鴕鳥肉、生蝦及生蠔等，任食；啤酒、汽水和酸梅湯任飲。
$8.8的海上鮮有時係海黃斑、黃立䱽、紅鮪或青斑等，總之天天不同，邊款新鮮就擺佢上枱，可以肯定的是每條約重14両，而原價是$98條。六位或以下惠顧，可在$8.8潮式滷水鴨或清蒸海上鮮當中任選其一，七位以上可試晒兩款。
酒樓搵來潮州師傅坐鎮，以家鄉秘方調配滷水材料，入口零舍有親切感，鴨肉烚得非常入味，配潮式蒜泥醋，夠晒滋味。半隻滷水鴨約斤半重，原價約$68，如今只要惠顧晚飯小菜，就可以十蚊有找的優惠價享用。七位以上幫襯還可以點埋$8.8的清蒸海上鮮。
店名：麗宮海鮮酒家
電話：23278228
地址：新蒲崗崇寧街77至79號地下至三樓
備註：晚餐優惠和任食火鍋不可同時享用