隔晚美股唔多妥，尤其係納指大散58點（3.1%），但港股反應溫和，恒指只係回落44點，期指更加冇跌到。計埋昨日所講4月恒指成分股除息相等於20點指數，昨日4月期指表面低水13點，實際係高水7點。
恒指下跌，但上升股隻比下跌股隻多差不多兩成，係好現象。大市已短期見底，昨日仍然下跌的大藍籌，有長實（001）收68.25元，跌0.50元；和黃（013）收67元，跌0.50元；新地（016）收57.25元，跌0.75元。3隻大藍籌都已見近期支持位，有機會反彈，帶動恒指上升。外圍股市若然定得住，恒指可望升番上萬二大關。
尋寶遊戲日日進行，升幅超過15%的股份有5隻，依次係美吉利（353）、乾隆科技（8015）、勝獅（716）、天鷹（1129）、新確（1063）等。其中勝獅同天鷹成交金額各2300萬元，買家真金白銀掟落去。
半新玩具股德林國際（1126）再升5仙，收1.20元，唔經唔覺，由前禮拜五1元起計，6個交易日內升幅20%。德林業務係生產玩具，2月以每股1.20元招股，掛牌後幾乎長期潛水，先幾日通知聯交所下星期三派成績表後，三扒兩撥上番招股價。德林以較高PE招股，預測截至01年12月止年度純利9360萬元，每股14.9仙，市價1.20元，PE8.1倍。
同係玩具股嘅崇高國際（209），亦有異動，收0.62元，升5仙。崇高以較低PE招股，𠵱家個價較招股價雖然高出7仙，但招股預測純利3400萬元，每股10.6仙，PE僅5.8倍。照德林嘅PE8.1倍計，崇高值0.86元，大把水位。
崇高昨有11球易手（街貨僅100球），係上月掛牌以來除咗頭兩日之外，最高成交紀錄，擺明做嘢，中線偏低，短線亦要昅住。