比聯昨日加碼發行中移動9029Call輪2.80億份，發行價26.5仙，同昨日收市價相同，新輪下禮拜二掛牌。
9029原有發行量2.50億份，今回增發2.80億份，重多過原有數量，捧場客再夾錢7420萬元落去賭（或者對沖、戥倉），信心好夠。比聯喺發輪商中，排名三甲之內，聲譽數一數二，主要因為啲輪嘅數據好OK、交投活躍，炒比聯輪輸咗都抵。
中移動（941）上月中派成績表後大散，𠵱家已定得住，PE吸引，炒上機會多過炒落。9029加碼貨下禮拜二登場後，有得睇，捧場客贏面大過輸面。不過以輪論輪，9044條件靚過9029，槓桿率雖然細啲，但溢價低啲補番數。9029掂，9044更掂。
恒指再跌44點，新地（016）跌75仙，落到去57.25元，同上月21日至26日低位相同。
大市應無大礙，新地見支持位亦有機反彈。博正股好番，揀新地Call輪玩番兩手，最佳對象係9115，昨日成交金額22M，僅次於恒指Call輪9045，炒味重，現價33仙，目標4字頭。