詩姐「唔嫁又嫁」？阿董部長制出爐在即，三司中唯一嘅變數就係即將約滿嘅詩姐。不過由於之前詩姐私底下透露過，唔想再連任，重同記者講「唔使擔心，我實走！」但二月到北京述職後，詩姐又改口風，叫大家等宣布。《文匯》重實牙實齒話「梁愛詩鐵定延任」，成個鐵口神算咁款，真係唔到你唔信。
八方噚日見到飛哥，佢身為詩姐老友，聽到詩姐俾人話「唔嫁又嫁」，好大感慨。佢最清楚詩姐心情，原先真係唔想再做落去。不過見各方盛情難卻，飛哥話詩姐份人就係咁，好難sayno，大有機會做多兩年。當然最大原因就係《基本法》二十三條立法，咁神聖嘅任務，睇嚟北京都係指定要詩姐負責。
對於呢位老友，飛哥講咗一句真心說話：「嚟緊呢兩年，佢會好辛苦！」梗係啦，二十三條講得好聽就係「神聖任務」，唔好聽即係「燙手山芋」，無論點做都可能成為箭靶，唔怪得詩姐咁猶豫。所以與其話係詩姐「唔嫁又嫁」，不如話係北京同阿董迫詩姐上花轎！
E-mail：