有人食芥蘭只會食葉而唔食梗，但亦有人剛相反，只食梗，小記就係後者嗰種人，唔食葉嘅原因係因為覺得有苦澀味，尤其是大棵嘅芥蘭，菜葉亦比較韌，所以小記寧可選擇細棵嘅芥蘭食，葉無咁粗嚡及無苦澀味，今次介紹嘅呢款芥蘭仔就係小記嘅至愛，佢嚟自中國，早前只有喺超市至有，最近終於喺街市蒲頭，每紮大概半斤重，只係$5。芥蘭仔短小精悍，梗嫩葉清甜，成棵烚熟，連葉帶梗食，又爽又滑，有齊兩種口感。
$5紮
部分菜檔有售
春回大地，濕氣較重，好易令人有疲倦及無胃口食嘢，假如係胃口欠佳大可以飲多啲湯水，粉葛係其中一款合時煲湯料，四至十月係粉葛盛產期，佢既有祛濕功效，又有清熱作用，以之配赤小豆、鯪魚煲湯，老少咸宜，最啱呢個濕悶天時飲用，煲過嘅粉葛，夠粉又夠甜。
$5?5.5/斤
各大菜檔有售
天氣愈嚟愈暖，消暑嘅西瓜亦開始登場，今年提早上市嘅台灣黑美人，售價重較去年為平，往年要$18-$20個，今年上市只售$15。黑美人，個子細細呈橢圓形，每個大概只有兩、三磅重，皮色深綠，核少，汁多甜美，要食好趁手啦！
$15個
部分果檔有售
記者：陳冰麗