港股噚日全日牛皮，收報10833，跌44點，成交縮至50億元。可能港股跌得少，所以盈富基金（2800）僅獲認購800萬個單位，重有5.22億個單位待售，如此銷情，港股後市唔插就有鬼咯。
鼎康御泰財務主席陳孝聰入股嘅光通數網（155）終於宣布2供1，每股供1.8仙，集資1.12億元，由陳孝聰及其控制嘅MegaMarket持有光通數網23.63％將會按比例供股，另外MegaMarket會包銷10.923億股，即係若果無人供股，陳氏就會增持至29.45％，仍未到30％全面收購觸發點，似乎與原先傳聞中嘅計劃有少少出入。
黑客話，可能陳氏重未取得證監會豁免，所以喺包銷股數方面就住。此股宣布供股後股價跌至1.8仙供股價水平，相信直到供股完畢前股價都好難有運行，不過供完之後，可能會有一系列收購注資行動，所以此股不宜太悲觀，不妨在1.8仙以下撈底。
華燊燃氣（8035）近日頻頻向證券界推介，相信都係時候配股集資進行收購嘞，不過係正個咁淡嘅市做配售係相當困難嘅事，即使所購嘅資產幾咁吸引都未必有人吼。不過，Cookie話，有台資及中資睇佢台戲，此股噚日逆市升3.5％，收報0.89元，成交只得369萬元，但當成交大幅增加時，恐怕已經買唔切。
自然美（157）噚日一度升至0.91元，然後回至0.83元收市，升13.7％，成交多達9000萬元，市場傳話有歐資入市當佢係中國民營企業咁炒，不過此股已開始有腳軟迹象。