今年一月再嫁、大前日先同老公孔小寶擺完喜酒嘅上山詩鈉，前晚已經撇甩老公，約咗圈中老友杜德偉、周汶錡等喺跑馬地「喜慶坊」食飯。
前晚十點左右，張智霖、袁詠儀同埋趙學而喺「喜慶坊」先行離去，四十五分鐘之後，記者就見到上山詩鈉、杜德偉同女友周汶錡，重有謝天華一齊出嚟，而另外有個女人就拖住上山嘅囡囡希拉利。
記者問上山係咪約咗兄弟姊妹團食飯，佢話唔係，只係同朋友食飯啫，重話自己冇化妝，叫記者唔好影佢相。
而上山個女性友人拖住希拉利過馬路嘅時候，唔小心踩甩咗希拉利嘅鞋踭，然後就喺街邊幫希拉利着番隻鞋，希拉利好乖女，全程好聽話，冇扭計。
許志安喺呢個月尾將會為商台舉行拉闊音樂會，馮仁昭聽聞商台本應搵許志安、蘇永康同梁漢文三個一齊做。點知蘇永康喺五月會搞音樂會，為免尷尬就同商台辭演。而梁漢文就覺得自己冇新歌，唔想貿貿然上台，結果呢個音樂會就由三合一變成許志安單人獨唱，所以近排安仔要重新編排過啲演唱歌曲同程序，都咪話唔頭痕。
前晚阿梅嘅演唱會，馮仁昭有去捧場，亦見到有唔少圈中人去捧場，好似徐濠縈、劉浩龍都有到，不過佢哋係由後門入，應該係怕正門太多人，費事引起騷亂啩！不過就有啲師奶同馮仁昭投訴，佢哋話去睇阿梅都係想聽歌，但個演唱會安排咗嘉賓同阿梅一齊做戲，搞到睇唔明。
呂頌賢早排上咗北京，為佢擔任代言人嘅卡賓時裝店開簽名會，同埋拍攝新一輯嘅春夏服裝，但呂頌賢喺開簽名會嗰日，咁啱落大雨，不過啲fans就堅持排隊，人龍由店內排到出街，所以呂頌賢簽足成個鐘頭，幫晒幾百個fans簽名先離場。
張國立、張鐵林同王剛三位內地演員，噚日喺美麗華酒店幫無綫外購劇集《鐵齒銅牙紀曉嵐》宣傳，張國立話：「拍完這部劇之後我的煙癮愈來愈大，因為劇中的紀曉嵐是吸大煙。」原來張國立九二年就開始以光頭look示人，佢話自己信佛，重有個法號叫「長昇」，不過就未出家。
陳芷菁呢排幫亞視主持一個探討人生嘅節目《你說怎麼辦》，本來亞視搵佢做客席嘉賓，同心理學教授陳立一齊主持，但芷菁錄影咗兩集之後，亞視對佢嘅表現相當滿意，𠵱家重同佢傾緊㖭食，希望芷菁再做落去，而芷菁聽到呢個消息亦好開心，證明佢自己冇荒廢到做主持嘅才華。