霍英東同何鴻燊嘅「賭國風雲錄」日日有高潮，最近霍生又出招，真係唔知兩老想玩到幾時。不過如果比較雙方身邊人馬嘅陣容，就似乎係賭王略勝一籌。話說前兩日八方同霍老傾開偈，問佢有冇同啲孫打吓網球，點知霍老答話好少見佢哋，甚至早前啲孫從外國返港，霍老都話：「我唔知佢哋幾時返㗎！好遲先見到佢哋。」
相比之下，賭王身邊成日一大棚人，唔係四個姨太就係啲仔女，好似三大巨頭（霍英東、何厚鏵、何鴻燊）番禺鴻門宴張相，席上賭王亦帶埋四姨太同最近入咗澳娛董事局嘅長女超瓊。
另一邊廂，一班記者日日伏喺信德中心門口追訪賭王，就連好少露面嘅賭王三姨太陳婉珍同佢個女何超雲，記者都有理冇理係咁影。雖然此姨太不同彼姨太，個女亦都細好多，但都證明賭王嘅姨太同仔女成日喺賭王身邊，唔多唔少都會知多啲內情，又好難怪記者唔放過任何一個追訪機會。
由此可見，兩大巨頭性格幾唔同，難怪夾份做生意會反面收場。
E-mail：