香港經濟不景，有工作經驗的都唔易搵工，何況初出茅廬的年輕人！有統計顯示，本港十五至二十四歲的青少年，失業率超過百分之十。這群初生之犢又無一技之長，就算想開舖，談何容易，又要捱貴租，又要冒風險。香港既然無出路，返深圳或可闖一闖，好像Kitty，二十出頭，憑着自己對時裝的熱愛和一股幹勁，開舖做老闆，成為深圳「Wet」妹的偶像。
記者：馮淑玲 攝影：伍慶泉
致勝之道
時裝店叫「蘭桂坊」，位於東門寶華樓地下室，紅彤彤的店面，在商場內尤其顯眼，一踏進店內，滿店是客，看到老闆娘Kitty一身Punk裝，在客人間轉來轉去，不時以沙啞聲音說：
「靚女，好耐冇見，嚟咗好多新貨，慢慢睇。」
「綠色好襯你啊，加條皮帶重好睇！可以襯埋條手鐲同個袋，𠵱家香港好興！」
「計平啲畀你嘞，一百蚊，見你係熟客咋，其他人就唔得㗎！」
短短個半小時，Kitty已做了近千元生意，客人買的不止是衫，還有手袋、皮鞋、皮帶及手鐲，配成一套，更有客落訂要做裙。「我同其他舖頭不同，我會幫客襯衫、襯形象，同埋設計做衫。因為我成日返香港，有少少時裝觸覺，知道興啲乜，又識襯衫，啲客知我幫到佢哋，咪好開心囉，一次過會買成Set嘢，使幾十變成使幾百。」
兩年前，Kitty到寶華樓搵舖，發覺商場人流疏，但抱着「博一博」的心態，決定在這裏開店。
「呢間商場乜都唔包，要自己申請營業牌，同報稅，都幾麻煩。
「初初開舖都幾驚蝕，又唔識攞貨，惟有硬着頭皮亂撞亂碰，以自己嘅喜好去揀貨，當時香港好興波波、星星同橫間嘅圖案，但深圳就好少人着。不過，我仍揀晒呢啲衫，點知第一日開舖幾乎全部賣晒，第二日重要再攞貨，好開心，一直只係諗住唔好蝕錢，點知唔蝕之餘重咁成功，我覺得全靠運氣。」
做生意不可只靠運氣，打響頭炮後，Kitty開始鑽研生意之道，做別人沒有的。「在深圳攞貨都幾難，間間舖都去東莞批發市場攞，搞到通街都係嗰啲貨，所以我會自己設計啲特色嘢加喺啲貨度，深圳就好少呢類舖。」
她拿着一隻釘有藍色珠片蝴蝶的鞋說：「好似呢隻鞋，我前幾日入貨，賣剩幾對，想清埋佢，就自己釘隻蝴蝶上去，今日就賣咗幾對。店裏面嘅貨，大部分都有我嘅設計，Idea係睇書、睇電視或去旅行得嚟。」
Kitty經常在店內穿着自己的設計，作為樣辦向客人推銷。「啲客覺得你老闆娘着得有Taste，會追隨你，跟你咁着，當你好似偶像咁。」
來「蘭桂坊」光顧的九成是熟客，大部分是時下深圳的「Wet」妹，身上的打扮緊貼香港潮流。Kitty說：「深圳多人蒲，做Yeah衫、D衫就最啱。」
阿Kit與朋友就在Kitty的店內，各花了超過三百元，買了T-恤、皮帶、手鐲和皮包，打算落D玩。
Kitty說：「我主要做熟客生意，有時會計平畀佢哋，若果熟客都計咁貴，佢哋會覺得你斬佢，下次就唔嚟幫襯。
「深圳啲人𠵱家好肯使錢，靚妹仔讀緊書，個銀包都有幾千或幾百蚊，重勁過香港。」她有時入貨都好大膽，會像批發般入幾十件。「我唔怕磧住啲貨，事關幾日就賣晒，因為我夠眼光。」
從前買衫怕捱鬧 收埋消防喉箱
Kitty好喜歡扮靚，讀書時省吃省用，也要儲錢買衫。「我細個超級貪靚，成日買靚衫，屋企人會鬧，所以買咗啲靚衫要收埋來着，好似我有時出街，先着得好正經，喺個袋就收埋啲靚衫，等去到個Friend屋企至換，又試過買咗啲靚衫，收埋喺屋企樓下嘅消防喉箱，等屋企無人至拎番去。」
經常買衫扮靚好似好「敗家」，沒料到卻成為Kitty創業的本錢。「畢業後搵唔到嘢做，對時裝有興趣，咪開舖囉，但香港租貴，咪嚟深圳用家姐個名開間舖試吓，諗住為興趣，又唔使靠屋企人養，自己買衫又平啲，真係無諗過會咁成功。」Kitty本在大陸出生，童年時才來港生活，而她的家姐卻一直留在堔圳，所以這次Kitty便全靠家姐國內人的身分在大陸創業。
現在五點起牀 揀貨十小時
萬事起頭難，Kitty當初開舖亦非一帆風順，試過無申請營業牌照被罰；曾得失過熟客；又因工作太辛苦，想過放棄。
「每朝五點起身，一個女仔跑到東莞攞貨，揀十個鐘衫，到晏晝五點，攰到死死吓，攞住幾大袋貨返舖頭開工。又試過揀衫嗰陣，俾架手推車撞跌，一個女仔喊都冇人理；又試過唔記得帶證，返嚟過唔到深圳二線關，又凍又餓，企喺關口度幾個鐘，等朋友來救我，真係好辛苦，嗰陣真係好想放棄。」
但Kitty每次想到為興趣工作，又再撐下去，並希望有天能夢想成真，「到時個個都着我啲衫，我嘅分店遍布各個地方，好多人拎住我間舖個袋。」她已計劃開分店，現在正物色地點。
做生意如着衫一定要有計劃
Kitty只是二十出頭，談起生意經，頭頭是道，問她如何學做生意？她笑說：「我老竇係潮州人，潮州人識做生意嘛……其實是用腦，成日瞓唔着，就諗嘢，覺得做人要有計劃，好似我着衫咁，一星期要諗晒每天着乜嘢衫，一日唔諗，成個人會無晒信心，做人同着衫同一道理，要有計劃，要諗多啲，𠵱家好少人會諗咁多嘢。」
創業本錢
租金（約二百呎） ?16,500（連兩個月上期、1個月租金）
人工（兩名夥計） ?1,800
裝修 ?12,000
入貨 ?8,000
雜項 ?3,000
流動資金 ?30,000
其他（時裝雜誌） ?1,000
總投資額 ?72,300
每月盈利
租金 ?5,500
人工 ?2,000
雜項 ?800（水電、管理費）
入貨 ?8,000
平均每月開支 ?16,300
平均每月營業額 ?20,000
平均每月盈利 ?3,700
開業手冊
1.找到合適舖位，與業主簽訂租約，作為地址證明。
2.到羅湖區工商分局（電話：5520397）申請營業牌照，約一周可取得。
3.再申請稅務執照（包括國稅和地稅），約一周取得。
4.到深圳火車站，坐大巴往東莞富民時裝城買貨，車程約個半鐘。
5.揀定日子，時裝店開張。
（深圳市工商行政管理局網址：
面對香港經濟不景，裁員不停，失業率持續上升，香港經濟步步轉型，人人北望。《北上創業》版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號蘋果日報副刊《北上創業》版收或傳真：27420542。請附聯絡電話。