好囉，好囉，小初早排認購德林國際（1126）坐咗艇，但覺得公司基本因素幾好，點都唔肯認輸，今次重唔守得雲開見月明。該公司下個星期公布上市後首個業績，斷估都唔差得去邊。
經紀陳重安慰小初，佢話近排德林造好，可能因為市場憧憬公司下周公布業績後有息派，同埋近排好似有機構性投資者留意德林，所以隻股有番多少生氣，鑊氣可望持續。
德林噚日最高見1.24元，收1.2元，仍升4.35%，終於重上招股價。
安慰完小初後，經紀陳又叫小初睇下百仕達（1168），佢話唔驚唔覺，隻股噚日已經升到去74仙，過咗52周新高，佢話，百仕達近排極之積極，深圳投地已經一鳴驚人，跟手又買埋銀網（622），然後人哋入股辰達永安（1189），佢又玩埋一份。
橫計掂計，如果有番多少水源會好用啲，所以唔排除有證券行問佢批唔批股集資喎。