前幾日「落機呀」出咗隻新殼，唔係Sell透光或者幻彩嘞，而係內置八達通晶片嘅手機殼。首批可能要睇市場反應，所以好多老闆都抱住觀望態度。八達通殼暫時只得3310型號（即係兼容埋3330），王子相信不久就會出埋最Hit嘅「白衫幽靈」，等啲表叔買嚟留念都好吖。售價大約$198，並冇任何儲值金額，需要時可增值。
講開「落機呀」，最近王子發現「愛記」嗰隻T66及「三叔」R620都可以支援埋「諾記」的鈴聲。雖然出嚟啲聲梗係唔夠R620嗰啲16和弦咁正，不過畀多個選擇大家，嫌入歌仔煩嘅朋友不妨上WAP「單撈」。呢次「諾記」認真有「飛屎」囉！