有好多車主為咗慳工夫，都會特別喺汽車用品店購買一部電動打蠟機，不過呢啲打蠟機嘅效果只係一般，除咗轉得唔夠快之外，轉動嘅扭力亦唔夠；今次我哋教大家自製一部打蠟機，而價錢亦與汽車專用嘅打蠟機差唔多。
首先喺深水埗鴨寮街嘅五金零件店，購買一部台灣出品嘅充電電鑽（價錢約$280），呢種電鑽每分鐘有650轉，入面更置有一組扭力轉換齒輪，同埋雙向及扭力調校掣；而電鑽另外重會附送充電座同電池各一，而電池嘅充電時間約為3.5小時。然後購買一個電鑽專用嘅打磨盤（價錢約$25），呢種工業用嘅打磨盤有兩個好處，一係方便攜帶，二係整個打磨盤用橡膠製成及具有彈性，因而唔會刮花車身，最後再加上一個打磨套（價錢約$20）就可以喇。打磨套有索繩固定喺打磨盤上，係可以拆下清洗嘅。我哋特別用3M嘅機蠟做測試，效果令人滿意；但喺磨光過程時，最好喺磨光套上加一塊起蠟布，此舉更可令效果與大型打蠟機差唔多。
但缺點就係電池問題，以一部豐田Corolla為例，一個充電池可磨光半邊車身，所以必需多購買一個充電池以應付需要（每個售價約$100）。有興趣嘅朋友，不妨試試喇。