中東風雲，果然成為跌市藉口。美股前晚因以巴衝突惡化，杜指一度跌百幾點，但收市只挫41點，納指重叻，反升17點。亞洲股市噚日嘅表現其實唔差，台、韓、日、星皆升，惟是港股表現特弱，恒指跌154點收場，報10878。趙飛雲始終覺得，噚日之跌主要同盈富嗰60億貨有關，其他只係藉口。
恒指昨日波幅，仍在預期範圍10700至11108之內，故此未有買入和黃認購證9110同恒指認購證9045。如果今日大市再挫，下試10700水平，則可先買第1注。
恐懼加息和中東危機，到目前為止只是調整藉口，不足以改變大市方向。美國若因經濟好而加息，根本唔使驚；以巴衝突在國際壓力下，相信始終有得傾。不過，趙飛雲樂觀中仍有些少擔心，一怕沙塵滾滾下阿拉法被殺，令局面難以收拾，二怕發生近似911的事件。雖然機會好低，但大家真係要睇住中東局勢發展，入市亦唔好博得咁盡。
佑威（627）終於突破配售價0.69元，昨收0.72元，逆市升近6%。佑威出售納米技術使用權利潤甚厚，佳績可期，呢次股價重展升浪，料先試前高位0.75元，到時可先沽部分，候低補回。