上海復旦微電子（8102）自從2月批過股後，股價就一浪高於一浪，噚日最勁，升咗12.33％，收1.64元。
小初打電話問最八卦嘅經紀陳，問隻股搞咩？
開頭佢隨口話因為台灣地震，所以台灣人搬錢過嚟香港，收尾即刻話其實講笑。原來係因為2月配股有3個月禁售期，下個月就期滿沽得，𠵱家作勢炒上，搞下成交，做吓準備都好應該。
復旦喺2月配售1.05604億股H股新股畀多名投資者，每股作價1.07元，集資1.04億元，批新股佔擴大後股本16.91%咁多。
由於復旦諗住發展通訊IC芯片產品，所以傳聞好大部分新股落喺台灣幫手上。經紀陳話，今次復旦炒上，好大部分都係得力於台灣幫的功勞。
呢批新股設有3個月禁售期至5月21日止，以現價計台灣幫已經賺咗50%，但下個月散唔散到貨，就要到時先知。