美聯物業3月份營業額約1億元,而中原地產則是1億零6萬元,創99年4月以來新高。中原本港住宅佣金收入達7237萬元,工商舖為677萬元,而中國部則有2092萬元。代理行做到生意,因為一手樓市好景。
新盤剛開賣,都會賣出唔少單位,經紀梗係搏命做啦,但就忽略咗二手市場,有代理公司高層向蘭西大吐苦水,話唔夠經紀做二手樓,做少好多生意。不過,啲二手客好多都畀經紀sell咗去買一手樓,難怪二手市靜。
地產代理「打街霸」已有一段日子,不過間唔中都聽到有經紀認唔到老細,一樣走埋去照sell嘅場面,究竟點解會咁?有代理高層話係因為個經紀一日要做成10幾粒鐘,個人好攰,有時只係條件反射咁見人就sell,根本唔理得佢係邊個。
政府近年大力推動環保,提供種種優惠鼓勵發展商建環保樓,但其實部分發展商一早已為物業加入環保元素,好似長實集團(001)位於中環嘅總部長江集團中心,98年入伙,最近獲機電工程署頒發「香港建築物能源效益註冊證明書」,成為全港首幢同時符合照明、電力、升降機及電梯等四項能源效益的商廈。發展商和黃(013)透露,長江集團中心嘅運作,可以節省12%能源。
蘭西