家陣市道唔好，同行競爭大，所以經營手機配件並不容易。最近先達就有一間舖頭逆市中搞吓新花臣，將CheapCheap手繩包裝成靚靚禮盒，生意好到日日舖外人頭湧湧，在一眾先達手機配件舖中殺出一條血路。無論是想創業，抑或買手繩送禮，各位不妨睇吓呢招逆市變陣掂唔掂？
記者：宋國榮攝影：黃子偉
Model：Shirley(Imagine)
這間專賣手繩的舖頭名為「百變Look」，主要賣點是可代客將手繩包裝成不同顏色及形狀的禮盒裝。據舖頭老闆梁先生表示，這類禮盒裝手繩以節日生意最好，皆因包裝得靚而且價錢便宜，用來送禮就最適合。平時客路就以女仔及學生客居多，因為通常女仔較鍾意買禮物送畀人，又最興一人一條兼加埋串名的字粒做孖公仔。而熟客中亦有一班外地回來的留學生，正是貪其禮盒裝，於是特地買回去給當地的朋友。
除了舖內已有發售的手繩，可按客人要求包裝為禮盒裝外，梁先生更比人行多一步，可以來料加工，在手繩上加入各種水晶字粒、叮噹仔、繩頭等裝飾，用來送禮絕對夠體面。而小記巡過場，發現舖頭內雖有多款手繩畀大家揀，但款式多數是時興卡通，未必人人啱使。如果客人已有另類心水手繩，亦可自行帶備搵老闆幫你加工改裝，價錢並不會因而有所增加。
老闆梁先生以往都試過經營手機配件舖頭，但是投資失利，每月蝕過萬，今勻轉做禮盒裝手繩全因睇準家陣手繩勁Hit。佢話，家陣人人一部手機，對手繩需求甚大，價錢唔貴之下年輕人貪新鮮鍾意周不時轉款，如果加些少噱頭如禮盒裝就更容易吸引他們，所以佢深信這門生意大有前景。以目前為例，梁先生稱大約每月可賺過萬利潤，若然節日臨近就更加可觀。
由月蝕過萬，到今日略有微利，梁先生話醒你逆市創業，最緊要注意以下三點：
(1)揀舖要適宜＿＿
若然大家想做手機配件，最好選擇先達開舖，皆因手電舖頭夠集中，樓下買完電話即刻上樓上買埋配件，直情近似一條龍服務。
(2)租金要控制＿＿
近期經濟唔好市道差，租金一定不可以太貴，而且舖頭位置要好，所以最好格多幾間價，梁生就是由大舖搬細舖，生意轉虧為盈。
(3)服務要親切＿＿
做這類手繩舖頭，客人慢慢揀字粒隨時磨你個多鐘頭，所以必須保持忍耐，服務好隨時客人再「班馬」幫襯。
店名：百變Look（23988956）
地址：旺角先達廣場1樓F76號舖