美國經濟剛剛復甦，香港又好似話有啲起色，點知中東局勢就愈整愈差，巴人人肉炸彈狂炸以色列，以軍幾乎殺咗阿拉法，到現時為止都睇唔到有任何緩和迹象，若情況持續，難保有日70年代的中東石油危機會重演。
現時沙地及科威特仍要受美國保護免受伊拉克攻擊，因此不會輕言停輸石油，不過若宗教狂熱導致沙地國內出現混亂，美國屆時想插手都幾難。即使情況不致失控，單是油價保持在27至28美元水平，亦勢必令全球嘅通脹比經濟增長來得更急更速。
恒指噚日一度急跌逾200點，有人以為是大戶壓價買盈富（2800），但事實上噚日一個單位都賣唔出，就知後市有啲問題。
早已歸邊嘅自然美（157）上市第二日至開車，逆市勁升23.7%，成交高達9958萬元，就絕對有睇頭。
黑客話今次擺明係台灣幫向市場來個下馬威，叫港股股民唔好睇低台灣民企。同自然美有密切關係嘅台灣中興綜合證券曾經講安排緊4個客戶來港上市，當然亦唔會畀自然美表現太過差。
噚日東方有色系高開後即刻有人散貨，結果東方有色（230）倒跌8.16%，收報0.45元；東方鑫源（1208）則倒跌8%，不過據Cookie話由於噚日接貨嘅人唔多，大戶手上重未出得晒啲貨，所以後市可能有排沽都唔定。此系股份先前傳出注資重組，上市公司會有着數而被炒起，股價噚日逆轉，唔通事情有變？