郭富城噚日一身型仔打扮，同沈殿霞（肥姐）、鍾麗淇、陳穎妍等人，去尖沙嘴美麗華酒店，出席由王賢誌同佢個妹搞嘅「名人二手衫慈善熱賣Take2」記招。
城城可謂善心爆棚，除咗私底下成立咗「郭富城慈善基金」外，噚日又專登喺屋企帶咗一套只係着過一次、價值八千蚊嘅Zucca西裝嚟拍賣。
城城話：「其實我今次總共捐咗百幾件衫褲出嚟拍賣，為咗做善事冇計啦。我由出道到𠵱家嘅衫褲鞋襪都租咗個四千幾呎嘅貨倉儲存，有朝一日需要嘅話，我會考慮開倉拍賣做善事，就算叫我拍賣我最心愛嘅車都在所不惜。」
肥姐噚日亦捐出一個Burberry手袋，佢話：「如果唔係早幾日執起晒啲衫褲落地牢，可能會捐多啲。」提到佢契仔謝霆鋒同張柏芝拍拖，肥姐話：「後生仔女嘅嘢最緊要唔好有怨同恨，一個人點可以一生只戀愛一次？唔好話霆鋒咁有型吖，我都唔止得一個男友啦。」
許志安唔理日前台灣地震，前日去咗台灣宣傳，佢噚日出席台北一個反翻版活動。
只見安仔攞住一把槍，作狀射人，以示反擊翻版，而現場重有一架車輾爛翻版碟嚟表示不滿。遲啲安仔重會喺台北演出一個反翻版演唱會。
謝霆鋒同陳冠希近排都有不利新聞，結果兩個人孭飛嘅兩套戲，成績都唔係咁好。呢兩套戲都係喺上星期上，截至周日計四日嘅票房，霆鋒做嘅《戀愛
早排周星馳傳過會拍馮小剛執導嘅《天下無賊》，據聞除咗星爺之外，葛優同章子怡都有份演出。《天下無賊》係講三個賊嘅故事，星爺同章子怡都係飾演賊，唔知馮小剛加葛優、章子怡同星爺，會有乜嘢化學作用呢？
近日傳出大肚嘅關淑怡，馮仁昭收到料話佢臨離港前，曾經去搵圈中好多人都光顧嘅堪輿學家邵師傅。聽講當時關淑怡已經見肚，行起路嚟條腰直直，一望就知大咗肚。據馮仁昭個朋友講，當時關淑怡擺出一副懶理旁人點睇嘅態度，走去問邵師傅好多關於感情嘅問題！
王菲呢排因情變而頻頻見報，早排佢同趙薇、梁朝偉同張震合作嘅電影《天下無雙》，農曆年期間已經喺香港同內地上咗。
而呢套戲亦已經喺台灣排期，準備今個月尾上映，唔知阿菲情變呢單嘢，對《天下無雙》嘅票房有冇幫助呢？