恒指跌154點，衰過好多亞太區股市。不過幾隻大藍籌跌至上次低位，即刻止跌回升，例如和黃（013）最低66.50元，呢個價係上禮拜同前禮拜低位，彈上67.50元收市，跌1.25元。
和黃熱門Call輪9050，跟正股跌，收42仙，跌11%，最低價41.5仙，亦係見番上禮拜底部止跌。正股守得住上次低位，9050有博反彈吸引力。
跌市中，3隻大型國內油股都有進帳，以巴局勢緊張，隔晚紐約期油每桶再升0.55美元，又創近期新高。中海油（883）升上10元，見新高，升30仙。中海油Call輪9195同9275，分別升23%同18%。
中石油（857）收1.63元，升2仙，亦都帶動Call輪9070升2仙。9070明年1月到期，負溢價2.4%，係預咗正股派高息。中石化（386）收1.30元，升4仙。但啲Call輪冇乜行，其中9062由31仙跌落30仙，理由係正股派8分人民幣股息。不過咁，隻輪明年1月到期，負溢價3.5%，槓桿率4.3倍，計埋股息因素，溢價唔高。石油Call輪中，可以諗呢件。