幾位馬主老友趁復活節去澳洲旅行，玩番幾日，之後參加號稱南半球最大嘅澳洲純種馬拍賣會，睇吓可唔可以買番一兩件筍嘢。今年買馬，有啲小風波，皆因馬會要求主持拍賣嘅公司WilliamInglis'&Sons准許馬會將買到嘅馬照X光，照到有事嘅就退貨，拍賣公司拒絕此要求，馬會於是杯葛拍賣，並且宣布以後所有輸入香港嘅馬，都要照過X光先，站在馬主嘅立場，眾馬主梗係支持馬會啦，Inglis'就算有佢做生意嘅道理，都唔會得到馬主同情。
問馬主C：「假如你買到隻馬，預備擺喺邊個倉？」馬主C話：「𠵱家人人都話蔡約翰好，我都想畀隻馬佢，但聽馬主L講，蔡約翰太過紅，佢最多會肯畀你隻馬排隊，除非係Danehill種啦！」排隊？隊尾有幾長呀？馬主C話：「多就冇，聽講waitinglist上有二十五匹起碼喎！」
嘩，真犀利，咁多馬主要等，可能真係啲馬一經阿蔡摸過，就一定贏馬都唔定，大家有冇後悔季初阿蔡得二十幾隻馬嗰陣，冇拉馬轉入蔡廐呢？幾個前領大馬房其實都唔易入，做馬主都唔係好巴閉㗎咋，冇頭冇面冇靚馬，大練馬師唔會睬你。所以一啲單頭馬主（即係只有一隻馬，唔係名種）只有擺啲馬喺中小型馬房，攞番多啲尊重，至於贏唔贏到頭馬，要講吓命水咯。