Hi-Fi音響駁電腦已經逐漸成為一種數碼音樂新潮流，今個星期香港AV場推出了兩部非常另類嘅數碼音樂產品，一部係日本水貨代表，Panasonic首部NetMDHi-Fi；另一部係香港人開發嘅MP3數碼音樂點唱機，兩機不約而同玩USB接駁PC下載音樂，相信Hi-Fi音響＋PC，勢必成為數碼音樂嘅新潮流。
記者：朱崇德
攝影：陳智良
SC-SV1係Panasonic首部同時具備播放CD、MD、NetMD、MDLP、收音機同電腦下載數碼音樂功能嘅迷你Hi-Fi。呢部機真係幾型仔，銀灰色機身，加上電鍍銀面板，真係有一種好Hi-Tech嘅感覺，十足一部PC咁。最掂都係佢個CD唱盤，除咗可以對應閱讀一般AudioCD外，重可以讀埋CD-R同CD-RW光碟，就算用燒碟機自製嘅音樂CD都可以直讀冇問題！擺位重非常講究，相信好多人都估唔到佢竟然收藏喺機面電鍍Panel之下，打開後就係一個透明藍嘅唱盤，真係型到震。
呢部機最大賣點係佢嘅NetMD功能。所謂NetMD係指Hi-Fi利用機身嘅USB插頭同電腦作聯繫，透過專用嘅《BeatJam》數碼音樂軟件（可對應Win98、2000、Me及XP），將ATRAC3、MP3同WAVE等不同格式數碼音樂，由電腦下傳至Hi-Fi並錄製在MD，從此電腦內的數碼音樂將可化身成為NetMD音樂跟住你隨身聽。
基本MD功能方面，SC-SV1有現時最流行嘅MDLP2、MDLP4嘅錄播MD功能，再加埋輸入歌名同Group編排歌曲播放次序等，相信一般人都好夠用。跟機連埋一套2.1聲道嘅直身喇叭，輸出功率為5W+5W+16W，試聽時發現力水都算幾夠，香港一般家庭嘅二、三百呎房仔或者客廳，相信都夠炸。
店舖資料：
PlasmaProShop
地址：尖沙嘴漢口道28號亞太中心地下G7舖
電話：23693801/23693809
PDHerculesPD-430-01呢部數碼音樂點唱機將所有不同傳輸介面同音樂格式嘅音樂資源，以硬件統一壓縮成為現時最流行嘅MP3格式，然後再儲存在機身嘅20GB硬碟之內，如果以平均4MB一首歌作計算，大約可以儲存到近5,000首歌曲，咁以後想點聽都冇問題。最方便之處就係將以往需要用電腦同軟件做壓縮嘅工序，改為用硬件一次過做晒，錄起MP3上嚟真係方便好多。
對應音樂嘅輸入格式照顧都好全面，首先係機身嘅CD唱盤，可以支援所有AudioCD、CD-ROM同CD-R等光碟格式，此外機身前重有USB接口，可以直接從PC下載MP3音樂至機內，至於一啲行Analog格式嘅音樂（例如錄音帶同黑膠唱片等），PD-430-01亦可以透過機身背後嘅音頻輸入接口，將音樂上傳至機內，並馬上壓縮成MP3格式音樂，真係非常方便。
呢部數碼點唱機重內置自動識別CD唱片同歌曲名稱嘅GracenoteCDDB數據庫系統；用家只需要將CD放入數碼點唱機內，就會自動翻查機身內置嘅CDDB2數據庫，並從超過20萬張唱片集中，翻查出唱片名稱同歌曲資料（亦可用遙控器自行輸入），用家可將該資料設定為MP3檔案的曲目名稱，用嚟錄歌仔認真方便就手。
PDHercules（幻音數碼有限公司）呢個牌子好似不見經傳，其實佢係由香港科技大學嘅教授同畢業生喺1999年1月創立，並成為科大「創業輔助計劃」下其中一間公司，以研發數碼音響同互聯網話音系統為主，藉此提高香港喺高科技產業嘅生產能力。
查詢網址：