張燊悅戴二百萬鑽飾感不快

張燊悅前晚出席《勁歌》季選口黑面黑十分不快，原來她不滿唱片公司找人贊助她佩戴鑽飾。

再搵衫襯
張燊悅前晚身穿由她任代言人、約值二百元的XS連身裙，並襯上一對Zucca鞋，但她身上的EightHearts鑽石頸鏈、手鏈及戒指卻總值二百萬元之多。不過張燊悅卻非常不滿的說：「啲鑽飾係唱片公司搵人贊助畀我戴，噚日要我去試戴先知，本來我預咗件好casual嘅衫今晚着，搞到我要臨時臨急再去揀衫襯，公司話畀個驚喜我喎。」
張燊悅坦言感到很不開心，她續說：「要有個保安跟出跟入，我覺得好唔自然呀，我不嬲都唔戴呢啲嘢。」
此外，昨日有人目睹張燊悅和雷頌德，趁公眾假期在山頂放狗，享受二人世界。