放咗幾日假期，天氣唔多好，小初只係留喺屋企唞下。正在悶到發慌之際，搵到經紀黃傾兩句，佢話留意緊隻冠忠巴士（306）。
冠忠舊年12月公布中期業績由盈轉虧，然後早排又因為減巴士司機薪金，搞到做咗一陣新聞主角，究竟間公司有咩咁值得留意？
點知經紀黃反問小初，有冇留意到間公司的股價走勢？佢話隻股有差唔多半年時間在90仙樓下橫行，其間重要無咩成交。不過，放假前兩日，股價突然有異動，上周四重升咗5.8％，收1.09元，幾乎就嚟到52周新高，重有成交較之前多咗好多，睇個勢唔似虛火。
佢話放假時周圍問過人，但可以列入炒作理由同埋較為可信的藉口只得一個，就係賣盤，但𠵱家冠忠有兩個主要股東黃氏兄弟同埋新世界發展（017），一係新世界買埋黃氏兄弟個份，一係有另外一個新股東買晒兩手貨，但邊樣至真，經紀黃就話唔知喎。