3月份啱啱過去，又係地產代理計數嘅日子，聽講中原地產3月份最好成績係新界區，原因係信和（083）月尾推出馬鞍山海典灣，賣得好好。不過今個月就應該輪到九龍區發威，因為幾個大盤如新地（016）長沙灣昇悅居已經放風會賣。
發展商委託代理賣除用佣金、獎金提高經紀積極性之外，好多時都興頒獎狀鼓勵代理公司。美聯張錦成話，計劃響公司闢一間房擺獎，佢哋收到幾多獎項，可想而知。
美聯物業屯門翠濤居嘅代理成績輸咗畀中原，但馬鞍山海典灣就促成280伙，主席黃建業今晚會開香檳慶祝。
另一邊九龍倉（004）昨日公布尖沙嘴擎天半島上月最佳銷售成績代理獎，得獎者是中原，獎品雖然係香檳一支，但由於意義大於獎品價值，所以九龍區「一姐」劉瑛琳非常興奮。
九龍倉助理董事黃光耀同場宣布獎品加碼，所有得獎代理行嘅區頭，都可以響擎天半島示範單位揀一件家具。一姐就揀咗一組古典儲物櫃。
而港置亦得到季度最佳銷售成績獎，以其中型行規模，成績勝其他大行，都唔簡單。
蘭西