上禮拜，中電（002）收32元，同近期最高價32.10元只係相差1格。1個禮拜，升0.30元，但隻Call輪9171只收26仙，反跌1仙。
9171愈來愈抵買，9月到期，負溢價增至3.2%，歷來最大，槓桿率12.3倍。正股派息1.05元，就算除息計，隻輪都係啱啱平水。中電冇錯係四平八穩股份，但隻輪有成半年玩，而槓桿率又咁大，冇理由咁快平水。
正股8個交易日後除息，到時冇咗除息因素，9171有機會有番些少溢價。另外，除息前，可能有股民搶息，拉高正股，亦拉高隻輪。畀啲耐性，9171始終會帶來理想收穫。
上實（363）上禮拜硬淨，收15.75元，有0.30元進帳。01年度盤數就快見人，應該唔錯，對股價有刺激作用。上實Call輪，可以諗吓。
9092同9156，係溢價最低嘅上實Call輪。9092（8月到期）現價25.5仙，溢價2.2%，槓桿率6.2倍。9156亦係8月到期，現價29.5仙，溢價1.7%，槓桿率5.3倍。兩隻輪都係弊在交投太少。