寶詠琴早前因腎衰竭，入咗港島港安醫院留醫，幾日後出院。上個星期佢又入醫院，喺手臂植入一條三吋長嘅膠管，方便將來長期洗腎，咁以後就唔使喺頸開窿。噚日寶詠琴洗完腎出院，記者見佢坐住輪椅，由女助手陪住佢出院。寶詠琴個樣好憔悴，而且好明顯瘦咗，右邊頸部重貼住塊膠布。
記者問寶詠琴嘅病情，佢用手指住頸部個傷口位，示意講唔到嘢。有記者繼續追問佢前夫劉鑾雄有冇再嚟醫院探佢，寶詠琴就連反應都冇，最後佢助手約喺三點半鐘送佢返屋企，寶詠琴哥哥後來都去咗佢屋企，逗留咗約半個鐘就離開。
趙薇着日本軍旗服幫時裝雜誌影相，呢件事雖然擾攘咗好耐，但風波依然未平息。話說馮仁昭噚日睇到內地有網頁報道，話近日有不法商人，將趙薇嗰張軍旗服相片，配合埋佢《情深深雨濛濛》同《愛情大魔咒》呢啲歌曲，喺武漢推出翻版CD，聽講一出就即刻賣晒，反應好好。
諗起之前啲人係咁批評佢，𠵱家又狂搶佢呢張老翻CD，你話係咪好矛盾呢。
雪兒同台灣經理人合約糾紛解決咗之後，台灣製作單位即刻搵佢拍《流星花園》續集。套劇除咗有F4原班人馬之外，重加埋雪兒，因為劇情講到大S與言承旭之間會出現第三者，監製認為雪兒好適合做呢個角色。雪兒已經答應演出，早幾日重去過試造型㖭！
鄭丹瑞（阿旦）噚日下午一點幾，帶住兩個女同老婆去銅鑼灣中央圖書館，但因為圖書館發生懷疑有持槍匪徒進入，所以阿旦只好掠門而過。阿旦同記者話：「我本來想帶啲女去睇圖書，但係𠵱家冇得睇，好掃興！」
黃翊噚日趁住公眾假期，同女朋友陳存正去咗屯門黃金海岸拍拖。
當時黃翊正跟女友手拖手逛商場，當發現記者影相時，黃翊同陳存正都好合作咁企定定，佢哋重搭晒膊頭，以及高舉V字勝利手勢，表現得好開心同溫馨。
周美鳳同葛民輝，前晚分別同友人去紅館睇梅艷芳（阿梅）演唱會。周美鳳平時忙公關公司嘅業務，前幾日正值復活節長假期，周美鳳偷得浮生半日閒去輕鬆吓，加上佢對仔女都大個，冇咁黐身，所以有朋友叫到睇阿梅個唱，佢當然奉陪啦。
無綫《智在必得》參賽者譚偉文（Wyman），早前企圖自殺不遂後，噚日佢同記者講會聯同有「非常教師」之稱嘅趙sir，喺今個月十六號去天水圍遊行示威。Wyman話：「我哋兩個人嘅遭遇十分相似，一樣俾法援處拒絕受理誹謗案，而趙sir三年前教過嘅四十多名學生都會嚟支持。」
姚瑩瑩噚日喺九龍塘新天地婚紗店，同無綫新劇《絕世好爸》內嘅男友河國榮拍攝一場結婚戲，姚瑩瑩話一定接受唔到男友花心，至於自己有冇遇過花心蘿蔔，佢好尷尬話：「未啩，過咗去唔會再諗，但係我真係唔可以同人分享一個男人㗎。」