近排，幾間德國汽車代理都有唔少新動作；例如平治預展全新E-Class、寶馬正式引入新7系，而奧迪A4Avant亦經已正式抵港。至於另一邊廂嘅福士，除咗原本位於銅鑼灣嘅Showroom之外，早前亦響九龍灣嘅大昌汽車服務中心，開設多一間新嘅陳列室㖭。
佢哋咁做係咪意味住會有新車到呢？咁就當然係正確啦！之不過較早前佢哋曾打算推出1.6公升版本嘅Beetle，以抗衡新一代MiniCooper同快將抵港嘅奧迪A2，惟測試結果欠理想，代理重將部Demo車運咗去澳門嗰邊出售㖭！但福士車迷唔使失望噃！皆因改咗做四眼仔嘅新一代Polo迷你CityCar，好快將會同大家見面喇！惟高性能嘅PoloGTi版本則欠奉，只剩得1.4公升型號；但用作日常代步之用的話，真係適合不過㗎！