寫稿寫得多，有時執筆忘字，有時誤用白字，有時用錯字而不知，趁放假都拎本《常誤詞語辨正》睇吓，希望唔好再次犯錯。此書作者容若，退休前經常在報章寫「文字專欄」，糾正不正之風；出版社就係「明窗」。
需要須要，時時搞到左丁山頭暈，唔知用邊個詞至啱。容若先生寫咗幾條：需要不是須要，須知不是需知，必須不同必需，無須不是無需，必需品不是必須品，軍需不是軍須。容若先生話：「須，就是『應該』或『一定要』；需，是指有用的東西，是個名詞。譬如「必須」指一定要這樣做，有強制性意味；「必需」指不可缺少的，多用在名詞前面。
另外，左丁山唔識得分，時時犯錯嘅就係寫「啞子吃黃蓮」，原來係「黃連」，容若先生指出黃連係毛莨科植物，用於熱病瀉痢，唔係黃色嘅蓮花！自己久唔久寫「劍及履及」係錯嘅，「屨及劍及」或「劍及屨及」（出自《左傳》，屨音據）先至啱；「身材」不是「身裁」呢。
真係開卷有益，左丁山唔係李登咁對文字有研究，枱頭冇幾多本字典辭典，所以久唔久就睇吓《常誤詞語辨正》呢類書，希望減少犯錯次數。譬如繙譯古語，好頭痛喎，「士為知己者死」，點解呢？有一本可能已絕版嘅《中國諺語選集》（陳佐舜編譯）中大崇基學院出版（一九七三年），就載有呢一條，譯為"thenoble-mindedmanwilllaydownhislifeforafriend"，夠好嘞啩。全書收輯一千零一條諺語，好有參考價值。