忽然間覺得DV機變得平民化！以往買部新DV機，閒閒哋上萬蚊部，不過近來嚟咗兩部好平好抵嘅DV機，新機開賣價都只係5、6千蚊價位，功能都非常強勁，簡直係迫人非攞錢買不可！據AV場一啲負責人表示，今次嘅DV新機大平賣，可能係將技術下放，希望將DV機由以往高檔消費品，轉變成普羅大眾嘅廉價消費品，相信功能強又價錢平嘅新機，重會陸續有嚟！
記者：朱崇德 攝影：陳盛臣
ImageGirl：嘉嘉
NV-GS5係近期水貨DV機中注目度較高嘅新機！由按開關掣到正式開始拍攝只需1.5秒，真係快得驚人！機身配備有一枚80萬像素CCD，質素算係不過不失，不過最強都係佢內建有彩色夜視拍攝功能，相較現時市面上機種，真係非常罕有！筆者曾在旺角街頭作實地測試，發現就算在目視情況下都好難睇清的地方，NV-GS5的彩色夜視拍攝功能都可以拍到清晰彩色影像效果（1Lux），真係非常厲害！
機身設計亦非常小巧，幾切合一般東方人士手形，機身重量只有470克，但依然有手感，可能係全支鏡頭由鋼管包裹，所以機身質感好，採用高質嘅LEICA鏡頭，備有10倍光學及500倍數碼變焦功能，啱晒對影像質素有要求的用家。為咗要玩盡數碼多媒體功能，機身備有SD卡擴展插槽，以配合動態影像拍攝（MPEG4）、靜態影像拍攝（JPEG）和數碼錄音等多種附設功能之用，以跟機8MBSD記憶卡計算，約可儲存到2分鐘MPEG4動態影像、180幅低解像靜態影像和作25分鐘數碼錄音。
CanonMV400可以話係注重實用嘅新機，新機開賣$4,380，非常抵買。機體內置一枚54萬像素的CCD，一般用家日常拍攝絕對應付有餘，鏡頭採用Canon自家開發的鏡頭組件，擁有10倍光學變焦和200倍數碼變焦能力，內置影像穩定系統，能瞬間更正震動的影像，確保畫面流暢穩定。
機身可插咪錄音，為攝錄片段旁白及配樂，以製作個人影片。試機時發覺操作流暢，各項選項反應敏捷，尤以Zoom鏡頭時的速度表現最佳。MV400的呈S流線型設計，切合一般人的手形，機身稍大，重量為540克，算是尚可接受。
JVC呢部GR-DVL160EG歐洲版水貨，雖然唔係新機，見街日子約一年，不過論功能都真係隨時拍得住上面兩部新機。GR-DVL160EG內置一個10倍光學變焦另加520倍數碼變焦的高效能鏡頭，而且一樣有彩色夜視功能，不過最正都係備有連聲連畫嘅SnapShot功能，真係絕對非一般拍攝享受。價錢重只係平到$3,880㖭，DV機中佢都算抵買！不過提醒各準買家，由於是歐版水貨，跟機並無中、英文說明書，買機前注意。
華仁會
地址：屯門屯盛街1號屯門市廣場一期1220號舖
電話：26180899
網址：