前巴西球王比利禮拜日喺巴西進行嘅一級方程式賽車，俾大會請嚟負責搖支格仔旗，點知好衰唔衰，喺舒密加衝線嗰刻，佢慒然不知乜都冇做過。
比利事後解釋自己因為睇唔到舒密加衝線，所以先至冇喺對方衝線嗰陣搖旗，但攝影機就影倒佢掛住同身後面嘅人吹緊水忘晒形。鬼咩，比利佢近排鬼死咁忙，周不時要飛嚟飛去出席商業應酬，又話邊隊可以捧世盃，邊隊又有機會入次圈，可能係吹水吹上癮，先至搞出今次笑話。比利連旗都唔識舉，唔怪得之某間藥廠會搵佢做代言人啦！
韋伯嘅新女友賓絲噚日千里迢迢陪住佢到亞特蘭大打波，呢鋪「韋哥」喺女友面前梗係唔衰得，點知鷹隊個助教即前NBA茅王麥漢喺比賽時重勁寸「韋哥」：「帝王可能贏到今季冠軍，但呢場波肯定輸硬。」激到「韋哥」更加搏晒命，結果帝王最後以一分險勝，呢鋪麥漢真係衰多口。
東岸呢排真係亂過亂世佳人，以為冇咗卡達嘅速龍肯定輸到一仆一碌，點鬼知佢哋重勁揪，連贏咗成五場，而冇幾耐之前重係東岸二哥嘅公鹿呢排竟然輸到連阿媽都唔認得，喺過去十二場波輸足九場，搞到𠵱家跌到第六位，如果佢哋重唔快啲「止瀉」，隨時俾後上嘅黑馬踢出季後賽，常規賽末段爭出線認真好睇！
噚日巫師輸波後波神佐敦大發牢騷，指教練哥連斯如果畀佢打番「PointGuard」，佢哋就唔使輸波。點知X浪網，噚日竟然大字標題話「“我本該打小前鋒的位置”喬丹對失利頗有微詞」。大佬啊人哋波神話想打「PointGuard」（控球後衞）唔喺「SmallForward」（小前鋒），連啲咁鬼簡單嘅英文都譯錯，不如先去問吓劉家傑先啦！
呢排啲波好興大手交易，上星期五紐記就大炒愛華頓六比二，前日維拉利爾亦大勝畢爾包五比二，買咗上盤嘅朋友自然分到笑，不過「梳打埠」推出嘅波膽之中，只有淨勝五球或以上呢一欄，即係話如果場波嘅比數超過四比四而又唔係淨勝五球或以上，「梳打埠」就會「通殺」，如果有興趣專攻大比數波膽嘅球迷，睇嚟要向英美嘅博彩公司埋手。