如果閣下是初學者，即係又未玩過雪橇，又未玩過滑雪板的話，敬請閣下正正經經請個教練，因為見過太多的例子，很多人滑完第一次自學滑雪之後，以後提起個雪字就耍手擰頭兼講粗口，一次過埋單以後唔玩。
唔好諗住男?女朋友識玩可以教自己玩，更多的例子是嗌交收場，籌備經年的浪漫之旅變成黑口黑面的把鬼假期。初學滑雪是痛苦的，不停地在雪地上行嚟行去，起身跌低與除板着板，需要付出大量的體能，非常容易令人𤷪𤺧，若然呢個時候再俾男?女朋友贈一句：「乜你咁死蠢㗎？」順理成章地就會感懷身世，然後悲從中來，眼淺者會淚眼盈眶，慘過《新不了情》。請教練則因為要磅水的關係，無論閣下點「死蠢」、點「論盡」，教練都會溫柔地講句：「你是最好的，你知道嗎？」爭在係用國語、日語定英文講啫。
未有充份準備及信心之前，切勿膽粗粗，人去你又去咁登上纜車上山頂，因為一上山頂深似海，人哋三、兩分鐘就滑到山腳，你就可能連滾帶爬幾個鐘頭先落到嚟，跟住又係耍手擰頭兼講粗口，然後感懷身世，悲從中來，淚眼盈眶。
一套合適的滑雪衫、一副太陽眼鏡以及一雙保暖防水的手套是必然的裝備。另外一個貼士是「蘿Pad」，此物能將閣下臀部的兩瓣肉緊緊包起來，成為一個保護尾龍骨的最佳屏障。如果撞着天氣唔好的話，雪地會變成如雲石地面一樣堅硬，一嘢坐落去那種痛到開花的感覺，實在係非筆墨所能形容。大嚿祖試過一次，隆然巨響之後，片刻不能動彈，急趕去施予援手，彷彿看見他痛得「三」隻眼也在眨吓眨吓，隔了足足兩分鐘才能講得出粗口。初學者，「蘿Pad」，唔好慳。（完）