鄭裕彤契女明美連的父親明嘉福去年底遭廖創興銀行入稟，追討有關郵輪「藍鑽石」的款項，但他稱只是誤會。昨日在中環發現明嘉福被人張貼大字報，指他欠款五萬元，他又稱與郵輪有關。
新世界主席鄭裕彤好友、馬主明嘉福昨日遭人於中環新世界集團總部門外，及附近公眾電話亭及垃圾桶，共張貼近三十張欠債大字報，指他欠款不還，開出的支票又遭彈票。
去年底，明嘉福曾被廖創興銀行入稟追數，後來他澄清只是誤會，那筆款項與他有股份的郵輪「藍鑽石」有關。對於今次被貼追數大字報事件，他說：「我知呢件事，好似貼咗成個禮拜啦，我已經搵律師跟進緊，唔排除有法律行動。」
問明嘉福有否拖欠款項？他說：「點會呢？其實件事係咁，我舊年同幾個本地及外國朋友，投資咗隻行走東南亞嘅巨型度假客輪，叫做『藍鑽石』，間公司有好多股東，我係細股，只佔八個巴仙股份。
「以我所知，郵輪嘅生意重未歸本，而經營郵輪有好多支出，例如食品同入油等雜費啦，可能公司未找數啩，但係我個人已經再貼多幾百萬美金出嚟。今次俾人追五萬蚊，係好細嘅數目，但係我律師都唔贊成我找呢條數，佢話債權人應該追間公司，唔係追我。」
記者再問明嘉福，大字報上形容他為「正宗XX商人」，他會否生氣？明嘉福說：「呢啲收數佬嘅行為，係爛仔所為。我係正當人家，喺香港三十幾年都係做正當生意，我唔正當馬會一早踢我走啦，我重點會有咁多富豪級嘅朋友呢？」
明嘉福續說：「呢啲人用貼大字報形式去傷害人，係誹謗，亦係犯法嘅。重有，張大字報嘅支票銀碼同號碼都係經塗改過嘅，呢啲人嘅做法先至唔正當呀。」
而明嘉福的女兒明美連，昨日亦在電話中說：「我爹哋係老實商人，俾人咁誹謗，一定會採取法律行動作出追究。」
採訪：JessicaNgan、RitaLeung
攝影：RickyChan