神愛世人，可惜世人總是互相仇恨，似乎連神亦難以化解。以色列同巴勒斯坦之間嘅衝突，喺復活節期間升級，中東局勢又見緊張。趙飛雲唔曉得誰對誰錯，只知道個市若要調整，又會多個藉口。
港股今日復市，美股昨晚收成點，自然影響港股復市走勢。本周美國有幾項重要數據公布，尤其係周五發表嘅就業數據更係市場焦點，加上中東局勢隨時有變，相信呢幾日美股牛皮居多，甚至會趁機調整。
本周港股得3日市，估計仍是橫行局面，向上唔易突破11108，向下10700水平支持頗強，即使失守，10400水平應可頂住。
不過，港股橫行局面唔會維持得幾耐。𠵱家先至係4月頭，4月期指未平倉合約已有3萬幾4萬張，個市遲早向一邊突破，發展成單邊走勢，只係唔知升定跌。
趙飛雲有幾位資深股友，已做咗馬鞍式期權組合，博個市有大動作。趙飛雲則係好友底，覺得美國經濟係真復甦，加息唔使怕，港股經過整固後便可破位而上，故此會按策略伺機買入和黃Call輪9110，亦考慮兼買恒指Call輪9045。