老總R講完佢嘅短暫大學教書經驗之後，老總C歎曰：「其實現時搵工唔易，報紙老總操招聘記者大權，啲學生見到有老總去教書，理應打醒精神，做好功課，希望攞番個A，畀老總一個好印象，畢業後搵工都易啲吖。」
識諗就當然係，但今日青年人同老總R嗰代好唔同，好難引用七十年代《獅子山下》嘅艱苦奮鬥情況投射喺二十一世紀嘅學生身上。高官就對我哋講：「你哋成班人寫稿之時，少啲講當年唔上堂得唔得，對學生有不良影響㗎。」何出此言？
原來六七十年代嘅港大生、中大生，唔少走堂走到飛起嘅，今日成咗名，報章專欄寫佢哋嘅「走堂威水史」，乃係負面新聞，譬如陳坤耀、許冠文、王晶等等，就係好例子。不過當年大學生少（約佔適齡組別，即十七至二十一歲嘅一巴仙多啲，一定唔超過兩巴仙），位位算係精英，今日大學生佔十六至十八巴仙，質素梗係有分別啦。
高官苦口婆心叫啲老總寫多啲、報告多啲教育界嘅好人好事，值得尊重，之不過我哋都係講事實啫。一位校長朝頭早返工，搭𨋢時見一位學生頭髮蓬鬆，衣服不整，腳穿拖鞋，於是問佢係唔係好趕，學生答：「幾乎唔記得起身，趕上堂。」校長幽佢一默：「再遲啲起身，咪要着睡衣？」學生答：「真係會㗎！」校長為之搖頭。青年專家邵家臻喺《城市論壇》講「𠵱家啲青少年覺得生活係唔生唔死唔過癮。」大家有何意見呢？