有時做足球隊嘅領隊真係令人好頭痛，要治掂班球員，又要攞到好成績，更加要保住飯碗，咁睇嚟英超下游球隊布力般領隊桑拿士就好似失敗咗少少喇！
話說當布力般喺今個月十七號聯賽輸咗畀列斯後，桑拿士就自以為諗到條妙計，帶咗班球員去杜拜七日遊，以為喺陽光與海灘下，可以幫佢哋紓緩護級壓力，喺餘下嘅比賽打好啲。點知咁反而令到班球員心都散埋，喺前日對住包尾嘅李斯特城時，重輸埋一比二，護級形勢更加凶險。
賽後桑拿士就大發雷霆，但其實，布力般陣中有唔少高薪球員，踢成咁的確唔抵幫，不過桑拿士嘅治軍手法亦好有問題，喺呢個護級存亡之秋，竟然唔叫球員加操或者做好戰略部署，反而帶佢哋去玩，唔通佢以為攞咗個聯賽盃，喺今季已經算有交代？我求大俠真係想快啲知道佢哋今日對修咸頓時會踢成點。
話說羅馬會長辛斯睇見國米射手韋利對費倫天拿踢得鬼死咁勇，即刻鬧韋利詐傷唔踢上個禮拜意大利對英格蘭場波。老實講，就算韋利真係詐傷，睇怕除咗辛斯佢老人家同羅馬球迷外，無乜人會鬧韋利，鬼叫人哋係意大利之寶咩！冇人想佢響世界盃前有任何傷病。辛斯，認命啦。
時值季尾，話就話強隊要搶分爭標，但都打殘晒，估唔到重有一啲比賽讓波讓到離晒譜。好似國米作客費倫讓一球?球半，印象中今季無乜意甲球隊作客要讓咁多。準備踢歐冠盃嘅巴塞亦主場讓拉斯彭馬斯球半?兩球。唔通大家重迷信名牌？好彩我哋名家波神同華度就無中招，貼中呢兩場下盤，信者得救！
眾所周知NBA班少爺兵係全球最好搵嘅球員，連啲超級大後備每年都淨袋幾百萬港幣，但係令我求大俠最唔順超嘅係佢哋啲假期又多過人，喺休季歎足成五個月重唔夠，𠵱家連四月一號復活節都話要放假，搞到我哋呢班NBA迷喺呢個難得嘅長假期冇波睇，認真掃興。好心班少爺兵學吓啲歐洲足球員，佢哋唔單止人工少過晒NBA啲百萬富翁，而且每年得嗰兩個零月假，邊度有班花旗國同行咁鬼歎，連愚人節都要放假。
魔術老鬼伊榮喺前日對溜馬嗰場波冇晒面子，居然經歷十七年嚟職業生涯第一次冇病冇傷嘅情況下，整晚長坐冷板凳，有人怪教練李維士唔識做，令呢位三十九歲老兵遭遇呢種難堪局面，但點可以怪得人㗎，如果你唔做急流勇退嘅決定，早就預咗有咁嘅一日啦！