一大班人開餐，總有些麻煩友意見多多，要戒牛肉、食生嘢想嘔、海鮮怕敏感、火鍋熱氣……煩到想喊？且慢，以下的百幾蚊任食海鮮餐正好解決麻煩。魚翅、燕窩、冷熱小菜連甜品，夠水準選擇多，真係要乜有乜，總之各家自掃眼前餸。今日就讓廚師和食客推介必食菜式，讓你們在限定兩小時內，吃個回味又回本。
記者：楊一凡 攝影：陳穎 ImageGirl:Vicky
挪威三文魚夠肥美，做刺身油滑美味，是年輕人必點美食；近年日本串燒流行，濃味的汁燒雞串也被列入任點行列，別以為串燒是小朋友專利，其實大人也很受落，醬油甜甜的，雞柳吃起來也很方便，而且肉串帶炭燒香，很回味。
三文魚夠軟滑，脂肪橫紋不會太厚，吃下去感覺不會太膩，每客原價要$38；雞肉串原價是$48，比坊間日本料理平三成，如今要幾多燒幾多，終於可以豪氣地串番次。
愛清淡的可選燒汁鮑魚菇炒雜菜，鮑魚菇好肉爽甜，燒汁加有黑椒、蜜糖和醬油，給素菜添色添味；新增的醬燒銀芽海參絲帶京菜風味，薄身的遼參口感夠滑，吸醬力特強，片刻已渾身鹹香，甘笋、冬菇和青紅椒絲，豐富口感。
鮑魚菇個味道幾清，有啲睇頭，無其他菇咁普通，連埋雜菜炒，清清哋，一日三餐少食菜，炒番碟夠健康。個海參炒得好惹味，如果有白飯柯打，一碟可以送幾碗飯。
一埋位每人先嚟一盅原價$68的竹笙蟹肉生翅，跟手玩選擇題：蒜茸巨蝦皇一隻、冰糖燉燕窩一盅或燒乳鴿一隻，三揀一，原價統統要六七十蚊，兩餸落肚，已值回票價，之後就算只食甜品都有你着數。
巨蝦皇是用越南老虎蝦，開邊加薑、葱、蒜，墊粉絲，蒸熟，好鮮味。魚翅落足料，燕窩夠晒滋潤，老人家最啱，乳鴿即是王子鴿，連骨都可以𡁻埋。
燒鵝也是鎮店之寶，日賣二三十隻，半隻約一百蚊。烤鵝步驟是用香料醃、風乾、上皮，頭一次烤半粒鐘，確保烤肉夠嫩，第二次是烤出脆皮，不過致勝之道還是新鮮，即烤即上枱，保持皮脆肉嫩，趁新鮮食，自然加分啦。
好鍾意食呢度的燒鵝，熱辣卜脆，肉多汁，多些少脂肪油潤可口，不過你預咗要等耐些少，十分鐘左右先有得食。
話明係海鮮餐，表現當然新鮮生猛。白灼蝦、炒斑球和凍肉蟹，原汁原味，無客不歡，加料炮製的泰式咖喱炒花蟹及豆筋豉汁蒸大鱔也相當惹味，咖喱汁香滑，當中拌了蛋漿更覺香濃，豆筋索盡豉汁和白鱔精華，鮮甜到痹。
咖喱炒花蟹煮得好入味，香而不太辣，食落好開胃；白鱔皮滑肉爽，好入味，至正係底下的豆筋，吸晒豆豉汁。
電話：27221663
地址：尖沙嘴漆咸道南87至105號百利商業中心地庫
座位：200個
營業時間：朝11晚12
付款方法：現金及信用卡(A.E.,Diners,Master,Visa)
收費：任食海鮮餐逢星期一至日晚上6時至12時供應，每人限兩小時。四月份成人特價$138，長者$128，4至10歲小童$108，小童不吃魚翅及燕窩的只收$68。