梅艷芳（阿梅）上周四（三月二十八日）開始喺紅館舉行「梅艷芳極夢幻演唱會」，佢呢次演唱會嘅服裝得到ChristianDior贊助，佢喺首場演出時，着住一件連身牛仔裙，喺一輪勁歌熱舞之後，發生春光乍洩事件。
呢件事並冇影響到阿梅連日嘅演出，佢依舊好落力。阿梅前晚嘅個唱，重吸引到徒弟蔡一傑、蘇志威、張學友羅美薇夫婦、梅媽媽等去捧場。張學友夫婦重好有長輩心，佢哋特登接載梅媽媽到場睇演唱會。
梅媽媽早前慶祝七十八歲生日，但當時阿梅忙於做演唱會綵排，結果人唔到禮到，梅媽媽話阿梅為佢支付咗約七萬蚊嘅壽宴費用，而梅媽媽前晚就親到愛女嘅演唱會支持，足見母女情深。
前女優仲春菲同吳國敬（阿敬）拍拖將近一年，但原來佢哋喺日前已經分咗手，仲春菲重立即飛咗去台灣旅行散心。馮仁昭噚日同阿敬通電話，問佢哋分手嘅原因，阿敬話：「我哋因為性格唔啱，所以最後決定分手，而且都希望趁後生，各自珍惜時間去發展事業。」
外籍攝影師杜可風，前晚去咗中環蘭桂坊消遣，當時佢一身便服打扮，單獨出現。記者問佢去邊度玩，杜可風就話：「我約咗朋友喺附近飲嘢，𠵱家要趕住去。」杜可風同記者匆匆傾完偈，就馬上急步離開，趕去赴約。
星皓老闆王海峰自從同旗下女演員林嘉欣傳出緋聞後，見報率十分高。就連林嘉欣早幾日入醫院，王海峰都第一時間攞束花去探病。唔知係咪見自己經常見報，所以佢開始注意形象，前日王海峰喺醫院揸住支煙好𤷪癐咁同記者講：「我都話食煙嘅相係唔可以影，你重影？」
亞視節目《女人．COME》遲啲進行大改革，會改名做《女人龍門陣》，由潘冰嫦、謝雪心、江美儀同鮑起靜等擔任主持，而曾華倩就唔會再做，因為曾華倩都主持咗《女人．COME》成兩年，都係時候改革吓。
粵劇紅伶紅線女（女姐）嘅fans，絕大部分係上咗年紀嘅一輩，估唔到有日馮仁昭同朋友傾開偈，佢話有次見到個十幾歲嘅妹妹仔，係咁追住女姐攞簽名。不過，唔知女姐嗰日係咪心情唔好，抑或有其他原因，佢竟然唔係太友善咁同個妹妹仔講：「我做乜要簽名呀！」搞到個妹妹仔想喊咁滯。